बर' रावखान्थि: Bodo Languages

 

Bodo Languages Bodopress News, 

बर' रावखान्थि: 

बाथ्रा भाव (Proverbs): बाथ्रा भावा गावनो मोनसे बुङनाय बाथ्रा । नाथाय बेनि गेजेरजों बाथ्रायाव थानाय सोदोबमाफोरनि गुबै ओंथिनि अनगायैबो गुबुन मोनसे गोथौ ओंथि एबा सानस्रि हाबदेरना थायो।बेनिखायनो बेखौ बाथ्रानि भाव बुंङो, जायनि गेजेरजों फाव फानदायनायाबो थादेरो।

बाथ्रा भावनि माखासे दिन्थि फोरखो गाहायाव होनाय जाबाय -----

1 . मोदोमनाय बिबारखौ होखोमानो हाया -- मोजां बिबारा जेरावखि थाया मानो बेयो मोदोमखायो आरो जेरावबो गोसारलाङो। मेगननि आन्दोआव बारना थाखोमाब्लाबो बेनि मोदोमनायखौ मानसिया संनानै नागिरलाङो। थिग बेबादिनो मानसिनि मोजां गुण एबा खामानियाबो समाजनि सोरगिदिं गोसारलाङी, गावनि गुणनि सोमोन्दै बेहा फोसावनो गोनां जाया । बिबारनि मोजां मोदोमनाय  बादि बिनि गुना बयजोंबो अनसाय जायो।बेखायनो   बुंनाय जायो मोदोमनाय बिबारखो होखोमानो हाया । नाथाय उल्थायै गाज्रि खामानि मावब्ला बेयो गाज्रियैनो जेरावबो गोसारलाङो।

2. अखा नागारनानै खफ्रि हमनाय: अखा हायोब्ला अखानि दैजों मोदोम सियो।बेखायनो बेनिफ्राय बारग'नो  थाखाय  मानसिआ खफ्रि हमो।अखा हाबाय थाफुनाय समावनो  खुफ्रि हमनांगौ । नाथाय अखा हाखांना स्रां जाखांनायनि खफ्रि हमोब्ला बेयाव जेबो खामानि फ़ैया एबा मुलाम्फा जाया । बेफोर बाथ्राजोंनो रुजुना बुंनाय जायो - सिखाव थांखांनायनि उनाव  बुद्धि , अखा थांखांनाय उनाव  खफ्रि। थिक बेबादिनो सिखावा इनजुर हाफ्लंनानै माल माथा लांखां जोबनाय उनावसो बुध्दि एबा सोलो फैयोब्ला बेयो जेबो खामानियाव फैया।बेनिखायनो जाथाइ एबा खामानि सोलिफुबाय थानाय समावनो सोलो एबा बुध्दिजों हाबाखौ मावनांगौ, अब्लासो जाफुङो।